Lo Tapioi

Dins mon viatge a Raiatea, montèri amb ma familha lo Tapioi. Lo Tapioi es una pichòta montanha, un mont de mai o mens 300m. La montèrem en una ora, èra una pichòta marcha dapasset!! Abans de montar fins al cim, rescontrerèm de tessons, de cavals e de vacas. De vacas en libertat, aviái paur de montar a costat  d'elas... Una paur tarrible... Fin finala prenguèri las vacas en fòtas mantun còps!!!

En arribant en naut, quina jòia!!! Quinas colors!!!!! Aviam una vista 360° sus l'iscla e mai sus la vila la mai granda qu'es Uturoa. 

La color del lagon, èra meravilhós! I a mantun blaus diférents e vesiam ben la barrièra blanca de coralh!

Lo païsatge èra vèrd, pas tròp de bèstias... Vegèri de plantas desconegudas. Un arbre grand que fa de pichòtas granas roges. Aquestas granas servissons per far de jòièls. Sus l'iscla es sonque sus lo Tapioi que se trapa aquestas granas! 

Vegèri tanben de fuèlhas que lo mond sonan "las aurelhas d'elefant". Son talament grandas que fan la mitat de mon còrs, rai que soi pichòta mas aquestas fuèlhas son grandassas. 

E i aviá totjorn los gals amb lor crit... E cridan e mai la nuèit... Una orror!!!

Si que non, i a un autre mont. Fòrça mai naut mas posquèri pas lo montar. Cal mai que mai un guida per i anar. Aquel mont fa 700m, se monta en qualques oras. E tot en naut i a una flor que se sona la tiare Apetahi, que se trapa sonqu'en naut e se pòt pas cultivar dins la valada. Es una flor meravilhosa que sentís fòrça bon, es qualqu'un que m' o diguèt!! Soi un pauc decebuda de pas i èsser montada, i anirai lo còp que ven, ai ja previst de los tornar véser. Tre qu'aurai d'argent...

Aprèp aver montat lo Tapioi anèrem faire las crompas e comprerèm de peis per lo manjar cru. Es un regal, vertadièrament. 

Dempuèi la debuta de l'annada escolara, mos parents ensajan de montar lo Tapioi cada dimècres! Poriam dire  que lo Tapioi es "le bois des espèces" a Nimes, sens la montada de segur, mas es un luòc ont lo mond van faire d'espòrt o de passejadas. Mas aquel mont lo cal montar lo matin d'ora. En fach fa talament caud la jornada qu'es pas possible de lo montar sens far una desidratacion!!!!

Viatge a Tahiti

Partiguèri en viatge per Nadal, mos parents me crompèron un billet per poder los véser. Partiguèri en Polinesia Francesa. Prenguèri per lo primièr còp l'avion. Quina istòria!!! Per i anar, partiguèri de París cap a Los Angeles. Puèi Los Angeles-Tahiti. De Paris prenguèri un avion de la companhiá air-france, èri assetada al costat d'una fenèstra redonda. Vegèri tot, las nivòls, los païses, las montanhas, l'aiga!!! Meravilhós!! Dins l'avion mangèri per tres!!! Aguèri dos platèus repais. E en mai i aviá de pastissons, de glaçets... Arribèri a Los Angeles lo 24 de decembre, i aviá pas degun! Passèri en 5min al contrarotlaire. Puèi esperèri un pauc abans de montar dins lo segond avion, èra de la companhiá air tahiti nui. E aquí, parièr, mangèri tròp, del còp refusèri lo segond platèu!

Quora l'avion d'air france se pausèt a Los Angeles èri fòrça mal, la davalada durèt mai o mens mièja ora! Una orror! Aviái dins la man una saqueta per lo moment "se per cas...". E aprèp per los autres avions i aviá pas ges de problèma. Era totjorn un aterriment plan melhor!

Quand partiguèri de Paris, dins l'avion aviái mas bralhas longas, mas cauçaduras tancadas, lo mantel e l'eissarpa!!! Arribèri a Los Angeles e comencèri de desvestir. Fasiá talament bon que cambièri de cauçaduras, de camiseta!! E quora arribèri a Tahiti, fasiá caud, un temps pesuc. Prenguèri una pension e prenguèri una docha sul pic e botèri una rauba!!! Aital èra la primièra jornada acabada!!! En fach coma i a 12 oras de descalatge, partiguèri e arribèri lo meteis jorn!!

E tot aquò durèt 24 oras... 

Per lo retorn èra un pauc mai complicat. Partiguèri un dimècres per arribar a Nimes un divendres! Partiguèri en shòrt e amb una camiseta e pichòt a pichòt, tot al long del viatge me botèri mantun vestits. 

Quin temps an arribant a Paris... Tot blanc, de nèu d'en pertot!!! Era pas de creire!!! Fasiá fresc, èra òrre!!!!! Me calguèt dos jorns per me rescaufar!!!